بەپێی هەواڵی کوردپررێس، ڕۆژی پێنجشەممە 24-02-2022 سەرچاوەیەکی بەرپرس لە پارێزگای هەولێر بە تۆڕی میدیایی رووداوی راگەیاند، ئەمڕۆ تێستی کۆرۆنا بۆ محەممەد سادق موعتەمدیان، پارێزگاری ورمێ کراوە و لە ئەنجامدا دەرکەوتووە، کە خۆی و ئەندامێکی شاندەکەی تووشی کۆرۆنا بوون.

ئەو سەرچاوەیە ئاماژەی بەوەکرد، بڕیاربوو ئەمڕۆ محەممەد سادق موعتەمدیان و شاندە یاوەرەکەی لەگەڵ نێچیرڤان بارزانی، سەرۆکی هەرێمی کوردستان و مەسروور بارزانی، سەرۆکوەزیرانی هەرێمی کوردستان کۆببنەوە، بەڵام تێستی کۆرۆناکەیان پۆزەتیڤ بووە.

ئەو سەرچاوەیە گوتیشی: "تەندروستیی پارێزگار و هاوڕێکەی باشە و لەلایەن پزیشکی پسپۆڕیشەوە چاودێرییان دەکرێت".

شایانی باسە رۆژی 22-02-2022 محەممەد سادق موعتەمدیان، پارێزگاری ورمێ و شاندێکی یاوەری، سەردانی هەرێمی کوردستانیان کرد و لە دەروازەی نێودەوڵەتی حاجی ئۆمەران، لەلایەن هێمن قادر، جێگری پارێزگاری هەولێر، نەسرووڵڵا رەشنوودی، سەرکۆنسوڵی گشتیی کۆماری ئیسلامیی ئێران لە هەولێر، عەبدوڵڵا ئاکرەیی، بەرپرسی پەیوەندییەکانی هەرێمی کوردستان لەگەڵ کۆماری ئیسلامیی ئێران و مەسعود باتێلی، سەرپەرشتیاری دەروازەی حاجی ئۆمەرانەوە پێشوازییان لێکرا.