بەپێی هەواڵی کوردپرێس، عەلی عەونی، ئەندامی سەرکردایەتی پارتی لە پەیجی خۆی لە فەیسبووک نووسیویەتی: دوای ئەوەی نێچیرڤان بارزانی سەردانی تورکیای کرد، لەلایەن ڕه‌جه‌ب ته‌یب ئەردۆغانەوە پێشوازی لێکرا، بەڵام بەداخەوە سایتی فەرمی سەرۆکایەتی کۆماری تورکیا زۆر بێڕێزی کردووە و نووسیویەتی (ئەردۆغان پێشوازیی لە سەرۆکی هەرێمی باکووری عێراق کرد) ئەمەش نیشانەی بێ ئەدەبی و بێڕێزی وڵات و سەرۆکی ئەوانە.

عەونی دەشڵێت: هه‌رێمی کوردستان، هه‌رێمێکی فه‌رمیه‌ و لە ده‌ستووری عێراقدا بە فه‌رمی ناوی هەرێمی کوردستان هاتووە، نووسینەکەی سەرۆکایەتی کۆماری تورکیا دەستدرێژییە بۆ ناو کار و باری وڵاتێکی دراوسێ.

ئەو سەرکردایەتییەی پارتی نووسیویەتی کە دەبێت هەرێمی کوردستان بە فەرمی کونسوڵی تورکیا بانگ بکات و هەم حکوومەتی عێراق بانگی باڵوێزی تورکیا بکات.

لە کۆتایی نووسینەکەیدا ئاماژەی بەوەکردووە، تورکی فاشیت لەسەردەمی کەمال پاشا و ئێستا هەبوونی کورد و کوردستان ئینکاری دەکەن، بەڵام کورد و کوردستان ڕۆژ بە ڕۆژ زیاتر و باشتر پێش دەکەوێت.