بەپێی هەواڵی کوردپرێس، لە ڕوونکردنەوەیێکدا، مەلا بەختیار، ئەندامى ئەنجومەنى باڵاى بەرژەوەندییە سیاسیەکانى یەکێتى ڕایگەیاندووە: "لە هەندێک سایت و پەیجدا درۆیەکى شاخدار بڵاو کراوەتەوە گوایە لە دیدارەکەمدا لەگەڵ بەڕێز مەسعوود بارزانى بۆ دروست کردنى کێشە لەناو یەکێتیدا ڕێکەوتووم".

ناوبراو دەشڵێت: "پێم خۆشبوو بە ناوی ڕاشکاوی خۆمەوە، ئەم درۆیەش بە درۆ بخەمەوە، هەرگیز قسەی وا لە دیدارماندا نەهاتووەتە ئاراوە".

مەلا بەختیار جەحتیش لەسەر ئەوە دەکاتەوە کە "بە پێچەوانەوە، قسەمان لەسەر ڕوونەدانی شەر لەگەڵ پەکەکە و چارەسەرکردنی ناکۆکییەکانی نێوان یەکێتی و پارتی کردووە، بە چارەسەرکردنی گرفتەکان لەگەڵ بەڕێز لاهور شێخ جەنگیشەوە".

ئەو ئەندامەى ئەنجومەنە باڵاکەى یەکێتى باسى لەوەش کردووە، هەر لە دیدارەکەدا جەخت لەسەر ئەوەش کراوەتەوە کە پێویستە کۆنگرەیێکى کوردستانى لە هەرێمدا ساز بکرێت بۆ ئەوەى هەموو لایەک پێکەوە لایەنەکانى دەسەڵات و بەرهەڵستکار و پسپۆڕ و ڕێکخراوە مەدەنییەکان ڕێگە چارەى دۆخەکە بدۆزنەوە.

لەکۆتایى ڕوونکردنەوەکەشیدا مەلا بەختیار ڕەخنە لەو سایت و ماڵپەڕانە دەگرێت کە بە "میدیا بەستە دۆلار" ناویان دەبات و دەڵێت، هەواڵى بێ بنەما و دوور لەڕاستى بڵاو دەکەنەوە.

کۆدی هەواڵنێر: 60113