بەپێی هەواڵی کوردپرێس، موقتەدا سەدر سەرۆکی ڕەوتی سەدر لە بەیاننامەیێکدا ڕایگەیاندووە: "هەر کەسێک بیەوێت بایکۆت بکات، با بایکۆتی هەرڵبژاردن بکات".

سەدر دەشڵێت: "ڕاستی جێگیر نابێت، درۆش شکستناهێنێت، تەنها بە ڕادەست کردنی چەک بە دەوڵەت و هەڵوەشاندنەوەی میلیشیاکان و بەهێزکردنی سوپا و پۆلیس و گرەنتی کردنی سەربەخۆیی و ملکەچ نەکردنی عێراق، هەروەها بەدواداچوونی ڕژد بۆ چاکسازی و لێپرسینەوە لە گەندەڵکاران نەبێت".

موقتەدا سەدر پێشتر وەڵامی بانگەوازی سەرۆک کۆماری عێراقی دابووەوە بۆ بەشداری کردن لە هەڵبژاردنەکان و ڕایگەیاندبوو: "کاتێک فەرمانی بایکۆتی هەڵبژاردنمدا، بەهیچ شێوەیێک بەنیاز نەبووم دوابخەم یان هەڵبوەشێنمەوە، بەڵام ئەوەی دڵتەنگم دەکات ئەوەیە کە گەلێکی گەورە بەشدارییان تێدا کردووە بۆ هەڵبژاردنی کەسانی گەندەڵ و بێشەرم و دزەکانی پارە کە هێشتا نەگەڕێنراونەتەوە".

هەروەها لە مانگی حوزەیرانی ٢٠٢٢دا سەدر بڕیاریدا لە پرۆسەی سیاسی عێراق بکشێتەوە و بەشداری هیچ هەڵبژاردنێکی داهاتوو نەکات، ئەم بڕیارەش دوای بانگەوازەکەی هات بۆ دەستلەکارکێشانەوەی هەر ٧٣ ئەندام پەرلەمانەکەی لە ئەنجوومەنی نوێنەرانی عێراقدا.