بەپێی هەواڵی کوردپرێس، ئیدارەی خۆسەری دیموکراتی هەرێمی باکوور و ڕۆژهەڵاتی سووریا لە بەیاننامەیێكدا ڕایدەگەیێنێت: ئەو حکوومەتەی ئێوارەی شەممە لە دیمەشق ڕایگەیێندرا، زۆر لە حکوومەتەکەی پێش خۆی دەچێت، بەو پێیەی ڕەچاوی فرەچەشنی لە سووریا نەکردووە.

ئیدارەی خۆسەر دەشڵێت: ئەو سیاسەتەی حکوومەتی دیمەشق پیادەی دەکات دەمانباتەوە بۆ چوارگۆشەی یەکەم. داوا لە دەسەڵاتدارانی دیمەشق دەکەین سیاسەتی دوورخستنەوە و پەراوێزخستن ڕابگرن.

جەختیش دەکاتەوە پێداگرین لەسەر بونیادنانی سووریایێکی دیموکراسی و هاوبەشی و ناناوەندێتی، کە گەرەنتی هاوڵاتیبوون بکات.
بەڕێوەبەرایەتی خۆسەر ئەوەشی وت: قۆرغ کردنی دەسەڵات لەلایەن لایەنێک و پەراوێزخستنی پێکهاتەکانی تری سووریا، ڕەت دەکەینەوە.

ئیدارەی خۆسەر باس لەوەش دەکات دووبارەکردنەوەی هەڵەکانی ڕابردوو، تەنها زیان بە سوورییەکان دەگەیەنێت و هەرگیز نابێتە هۆی بەدیهێنانی پرۆسەیێکی سیاسی گشتگیر کە بتوانێت کێشە هەڵپەسێردراوەکان و کێشە و قەیرانەکانی سووریا چارەسەر بکات.