بەپێی هەواڵی کوردپرێس، ناوەندی پەیوەندییەکانی هێزه‌کانی سووریای دیموکرات (SDF) له‌ ڕاگه‌یه‌ندراوێکدا باسی له‌وه‌کردوه‌، "۱۵ شه‌ڕڤان لە مانگەکانی تشرینی دووەم و کانوونی دووەمی ئەمساڵدا لە بەرخۆدان لە دژی هێرشە داگیرکارییەکانی تورکیا و گرووپە بەکرێگیراوەکانی سه‌ر به‌ تورکیا شەهید بوون".

لە ڕاگەیەندراوەکەدا هاتووە، "۱۵ شه‌ڕڤان بە خوێنی خۆیان گیانی نیشتمانپەروەری و ئەخلاقیان نیشاندا، شه‌ڕڤانان لە لادێکانی حەلەب، مه‌نبج و پردی قەرەقۆزاک و بەنداوی تشرین و دێرەزوور لە بەرخۆدانی پاراستنی خەڵکی باکوور و ڕۆژهەڵاتی سووریا لە هێرشە داگیرکارییەکانی دەوڵەتی تورکیا و بەکرێگیراوەکانی شەهیدبوون".

هه‌سه‌ده‌ ده‌ڵێت: "هەموو شەهیدەکانمان بە ڕێزەوە یاد دەکەینەوە، یادگارییەکانیان لە ویژدانی گەلەکەماندا زیندوو دەبن، سڵاو لە کەسوکاری شەهیدان و گەلەکەمان و تێکۆشەرەکانمان و هیوای سەبوورییان بۆ دەخوازین".