بەپێی هەواڵی کوردپرێس، گێیر پێدەرسن، نێردەی تایبەتی نەتەوە یەکگرتووەکان بۆ کاروباری سووریا لە کۆنفرانسێکی ڕۆژنامەڤانیدا لە دیمەشقی پایتەختی سووریاوە ڕایگەیاند "هیوایەکی زۆر دەبینین لەو سووریا نوێیەی دروست بووە. سووریایەکی نوێ کە دەستوورێکی نوێ پەسند بکات و لەکاتێکی گونجاویشدا هەڵبژاردنێکی ئازاد و دادپەروەرانەی لەدوای قۆناغی ڕاگوزەری سیاسیدا تێدا بکرێت".

پێدەرسن، داواشی لە وڵاتان کرد؛ بەزووترین کات هاوکاری مرۆیی بگەیەننە سووریا و سزاکانی سەر ئەو وڵاتەش هەڵبگرن، کە بەهۆی پێشێلکارییەکانی دەسەڵاتی بەشار ئەسەدەوە بەسەریدا سەپێندراوە.

ناوبراو وتیشی، "یەکێک لە ئاڵنگارییە سەرەکییەکانی بەردەم سووریای نوێ، دۆخی ناوچە کوردییەکانی سووریایە لە باکووری ڕۆژهەڵاتی ئەو وڵاتە و مەترسیی دروستبوونی شەڕێکی گەورە لەنێوان هەسەدە، کە لەلایەن ئەمریکاوە پشتگیری دەکرێن لەگەڵ گرووپە چەکدارەکانی سووریا".

سەبارەت بە ئاگربەستی نێوان هەسەدە و گرووپە چەكدارەكان، پێدەرسن دەڵێت: "خۆشحاڵم ئاگربەستەکە نوێ کراوەتەوە و پێشدەچێت جێبەجێ بکرێت، بەڵام هیواخوازین چارەسەرێکی سیاسی بۆ ئەو پرسە بدۆزرێتەوە".