مەنبج کەوتە دەستی گرووپە چەکدارەکانی سووریا
پوختەی هەواڵ
بەپێی هەواڵی کوردپرێس، ڕۆژی دووشەممە، ۹-۱۲-۲۰۲۴ سەرچاوەیەک لە نێو شاری مەنبج بە تەلەفزیۆنی ڕووداوی ڕاگەیاند، چەکدارانی ئۆپۆزیسیۆنی سووریا تەواوی شارەکەیان کۆنترۆڵ کردووە.
بە گوتەی ئەو سەرچاوەیە، بەشێک لە هێزەکانی ئەنجوومەنی سەربازیی مەنبج و هێزەکانی سووریای دیموکرات، لەگەڵ هێرشی گرووپە چەکدارەکانی ئۆپۆزیسیۆن پشتیان لە هەسەدە کردووە و پەیوەندیان بەو چەکدارانەوە کردووە.
لە دوای کۆنترۆڵکردنی کۆبانێ و مەنبج لەلایەن هێزەکانی سووریای دیموکرات، هێزەکانی ڕووسیا لە مەنبج و کۆبانێ بوون، بەڵام لە دوێنێوە هێزەکانی ڕووسیا ئەو دوو شارۆچکەیەیان چۆڵ کردووە.
چەکدارانی 'سوپای نیشتمانیی سووریا' تاوەکوو پردی قەرەخۆزاخیان کۆنترۆڵ کردووە، کە دەکەوێتە سەر ڕووباری فوڕات و سنووری نێوان کۆبانێ و مەنبج.
لەدوای هێرشەکانی هەیئەی تەحریری شام بۆ سەر حەلەب لە ۲۵ی مانگی ڕابردوو، چەکدارانی 'سوپای نیشتمانیی سووریا' دەستیان بە هێرشەکانیان بۆ ناوچەکانی ژێر کۆنترۆڵی هەسەدە کرد و ناوچەی شەهبایان کۆنترۆڵ کرد.
بۆچوونی بەکارهێنەران