بەپێی هەواڵی کوردپرێس، وەزارەتی دەرەوەی سووریا، ئەمڕۆ یەکشەممە لە ڕاگەیەندراوێکدا بڵاویکردەوە، ئەمڕۆ لاپەڕەیەکی نوێ لە مێژوی سووریادا دەنووسرێتەوە، کە پەیمان و میساقێکی نیشتمانی دەستپێدەکات و سوورییەکان یەکدەخات، یەکیان دەخات و دابەشیان ناکات، لە پێناو بنیاتنانی نیشتمانێکدا کە دادپەروەری و یەکسانی تێدا بەرجەستە بێت و هەموومان سوودمەند بن لە مافەکانیان.

بەگوێرەی ڕاگەیەندراوەکە، نوێنەرایەتییە دیپلۆماسییەکانی سووریا لە دەرەوەی وڵات پابەند دەبن بە خزمەتکردنی هەموو هاوڵاتییان و بەڕێوەبردنی کاروبارەکانیان، ئەوەش بە پشتبەستن بەو متمانەیەی کە لە نوێنەرایەتی کردنی گەلی سووریادا هەیانە.

وەزارەتەکە جەختی لە گرنگی پاراستنی گیانی یەکێتی نەتەوەیی و پێکەوە کارکردن بۆ بنیاتنانی داهاتوی سووریا کردەوە.

ئەوە لەکاتێکدا دوای هەفتەیەک لە پێشڕەوەی گرووپە چەکدارەکانی سووریا بە سەرۆکایەتی ڕێکخراوەی تەحریر شام، بەرەبەیانیی ئەمڕۆ گەیشتنە شاری دیمەشقی پایتەختی سووریا و ڕووخانی دەسەڵاتە 54 ساڵەکەی بنەماڵەی ئەسەدیان ڕاگەیاند.