بەپێی هەواڵی کوردپرێس، ناوەندی چاپەمەنی و ڕاگەیاندنی دەم پارتی لەبارەی هێرشەکانی دەستەی تەحریری شام و گرووپە چەکدارەکانی ئۆپۆزسیۆنی سووریا بۆ سەر حەلەب و تەلڕەفعەت و پێشڕەوی کردنیان بەرەو حەما، ڕاگەیێندراوێکی بڵاوکردەوە.

لە ڕاگەیێندراوەکەدا هاتووە: "چەند رۆژێکە پێشهاتێکی مەترسیداری شەڕ و پێکدادان و ئاڵۆزی لە سووریا دەستیپێکردەوە. بەهۆی ئەم پێشهاتەوە، ئەو کورد، عەرەب و پێکهاتانەی دیکەی حەلەب و تەلرەفعەت کە چۆک بۆ چەتە و گرووپە هێرشکارەکان دانەدات، هەڕەشەی خوێنڕشتنیان لێ دەکرێت و تەنانەت مەترسی کۆمەڵکوژییان لەسەرە".

دەم پارتی دەشڵێت، بەتایبەتی خەڵکی سڤیل لە تەلرەفعەت و هەزاران خەڵکی ناوچەکانی دیکە کە خۆیان گەیاندووەتە تەلرەفعەت، کراونەتە ئامانجی ئەم چەتە هێرشکارانە.

دەم پارتی داوا لە لایەنە سیاسییەکان، هێزە دیموکراسیخوازەکان، کۆمەڵگەی نێودەوڵەتیی و سەرجەم ڕێکخراوە جیهانییەکان دەکات، لە دژی شەڕ و تووندوتیژی دەنگیان بەرز بکەنەوە و هەوڵەکانیان چڕبکەنەوە لەپێناو پاراستنی ژێرخانی ئاشتی لە دژی جەنگ. هەروەها داوا لە سەرجەم لایەنە نێوخۆیی، هەرێمی و نێودەوڵەتییەکان دەکات هەوڵەکانیان چڕ بکەنەوە بۆ راگرتنی ئەم پێشهاتە مەترسیدارە.