بەپێی هەواڵی کوردپرێس، ئایەتۆڵڵا عه‌لی خامنه‌یی، رێبه‌ری باڵای کۆماری ئیسلامیی ئێران ئه‌مڕۆ دووشه‌ممه‌ له‌ دیدارێکدا له‌گه‌ڵ هه‌زاران بەسیجی کە لە سەرانسەری ئێران ئامادەبوون ڕایگه‌یاند: "سبەینێی بەرەی به‌رخۆدان بە چەندین جار بەهێزتر و فراوانتر ده‌بێت لە ئەمڕۆ، ڕژێمی زایۆنی سەرەڕای درێژەدان بە تاوانەکانی شەڕ لە غەززە و لوبنان مەیدانەکە سەرناکەوێت".

ڕێبەری باڵی شۆڕشی ئیسلامی له‌باره‌ی هێزه‌کانی به‌سیج-ی ئێرانەوە، ئاماژه‌ی به‌وه‌کرد: "بەسیج پێش هەموو شتێک قوتابخانەی فیکر و ئایدۆلۆژیایه‌، کە پشت بە دوو لۆژیک و بناغەی بنەڕەتی دەبەستێت، ئەوانیش ئیمان و باوەڕداربوون بە خودا و متمانە بەخۆبوون و باوەڕ بەخۆبوونه‌، بۆ دروستکردنی ڕۆڵێک".

ئایەتۆڵڵا خامنەیی ئه‌وه‌شی وت: "به‌گوێره‌ی ئایەتەکانی قورئان فیرعەون میللەتەکەی زەلیل کردبوو تا گوێڕایەڵی بن، بێگومان فیرعەون لە سوڵتانەکانی ئەمڕۆی ئەمریکا و ئەورووپا شەریفتر بوو؛ چوونکە گەلانی دیکه‌ زەلیل دەکەن بۆ تاڵانکردنی بەرژەوەندی و سەرچاوەکانیان".

له‌باره‌ی ده‌رکردنی فه‌رمانی ده‌ستگیرکردن بۆ بینیامین نه‌ته‌نیاهۆ، سه‌رۆک وه‌زیرانی ئیسرائیل، رێبه‌ری باڵای کۆماری ئیسلامیی ئێران ڕایگەیاند: "ئەو فەرمانی دەستگیرکردنەی کە بۆ نەته‌نیاهۆ دەریانکردووە بەس نییە و دەبێت ئەو و ئەو سەرکردە تاوانکاره‌کان سزا بدرێن تا مردن".