بەپێی هەواڵی کوردپرێس، لاهوور شێخ جەنگی، لە ئاهەنگی ناساندنی کاندیدانی لیستی بەرەی گەل لە پارێزگای دهۆک، وتەیەکی پێشکەش کرد و رایگەیاند: داهاتی سێ دەوڵەت دێتە پارێزگای دهۆک و خێر و بێرێکی زۆری تێدایە، بەڵام بەهۆی قۆرخکاری و چەتەیی دەسەڵاتەوە خەڵکەکەی لە دۆخێکی دژواردا دەژین و بەپێی ئامارەکان دهۆک هەژارترین پارێزگایە لەسەر ئاستی عێراق و هەرێمی کوردستان.

هەروەها وتیشی، پارتی بە پشتیوانیی خەڵکی بادینان نەبێت هێزێکی بچووکە، دەبێت بادینییەکان سزای پارتی بدەن.

ئاماژەی بەوەش دا، ژمارەیەکی زۆری گەنج و لاوی ئەم دەڤەرە بێکارن، خزمەتەکان بە پارتی نەکراوە و بە بەرەی گەل دەکرێن.

جەختیشی کردەوە کە بەرەی گەل دژی داگیرکارییەکانی تورکیایە لە بادینان و دژی ئەو سنوور و جیاکارییەشە کە پارتی و یەکێتی لەنێوان پارێزگاکان دروستیان کردوە.

شێخ جەنگی وتیشی: "هەرگیز باوەڕ بە سیناریۆی نێوان پارتی و یەکێتی مەکەن"، "ئێمە ئەو هێزەین چیتر رێگە نادەین دەنگتان بدزرێت".

لاهور شێخ جەنگی لە بەشێکی دیکەی قسەکاندا وتی، پارتی سەرانە لە خەڵک و کاسبکاری بادینان دەسەنێت.

ئەوەشی خستەڕوو، ئەو دەستانە دەبڕین کە چاو دەبڕنە گیرفانی خەڵک، رێگە نادەین چیتر زوڵم و خۆسەپاندن بەردەوام بێت.

ئاماژەی بەوەشدا، پارتی و یەکێتی دەیانەوێت رێککەوتنەکان لەگەڵ بەغدا تێکبدەن.

سەرۆکی لیستی بەرەی گەل وتیشی، پارتی و یەکێتی دەناسم و دەزانم چەند هەرزانن لای نەیارانی کورد.

ئەوەشی وت، بڕۆن و بە دەنگەکانتان حزبە گەندەڵەکانی دەسەڵات سزا بدەن، پارتی و یەکێتی لە دەنگی خەڵک دەترسن و قەدری دەنگی خۆتان بزانن.