بەپێی هەواڵی کوردپرێس، لە بەیاننامەکەی فراکسیۆنی ئایندە ئاماژەبەوەش دراوە،" لێرەوە داوا لە حکوومەتی ئیتیحادی لە بەغداد دەکەین، رێکارەکانی رووبەڕووبوونەوەی ھێرش و پەلامارەکانی سوپای تورکیا بۆسەر عێراق و ھەرێمی کوردستان توندتر بکات و پێداچونەوە بە پەیوەندییەکانی نێوان عێراق و تورکیادا بکرێت".

دەقی بەیاننامەکە:

هێرشەکانی تورکیا ئیدانە دەکەین

خاک و خەڵکی عێراق، بە ھەرێمی کوردستانەوە، خاوەنی سەروەری و شکۆی خۆیانن و دەبێت ھەموو لایەنە نێودەوڵەتی و ھەرێمایەتی و ناوخۆییەکان رێزی بگرن. بۆیە ئێمە سەرکۆنەی ھەر بێڕێزی و پێشێلکارییێک دەکەین کە دەرحەق بە نیشتیمانەکەمان و ھەرێمی کوردستان و خەڵکەکەی دەکرێت و لێرەوە جارێکیتر بە توندی ئیدانەی پەلامارەکانی ئەمڕۆی فڕۆکە جەنگییەکانی تورکیا دەکەین بۆ سەر ھەرێمی کوردستان کە تیایدا چەند فەرماندەیێکی پاسەوانی سنوور گیانیان لەدەست داوە.

لێرەوە داوا لە حکوومەتی ئیتیحادی لە بەغداد دەکەین، رێکارەکانی رووبەڕووبوونەوەی ھێرش و پەلامارەکانی سوپای تورکیا بۆسەر عێراق و ھەرێمی کوردستان توندتر بکات و پێداچوونەوە بە پەیوەندییەکانی نێوان عێراق و تورکیادا بکرێت.

کۆدی هەواڵنێر: 60113