کوردپرێس:

ئاژانسی هەواڵی ڕۆژنیوز، ڕایگەیاند، فڕۆکە جەنگییەکانی سوپای تورکیا بۆردومانی گوندەکانی سنیان و بندێوانیان لە ناوچەی برادۆست و ناوچەی خواکورک لە سنووری پارێزگای هەولێر کرد.

هەر بە پێی ڕاگەیێندراوی ئاژانسی هەواڵی ڕۆژنیوز فڕۆکە جەنگییەکانی دەوڵەتی توركیا پاش بۆردومانەکەش زۆر بەنزمی بە ئاسمانی ناوچەکەدا سووڕاونەتەوە و بەهۆی بۆردومانەکەشەوە جگە لە زیان گەیاندن بە سروشت و ژینگەی ناوچەکە کارەبای هەردوو گوندی سنیان و بندێوان لە ناوچەی برادۆست پچڕاوە و لە ئێستادا ئەو دوو گوندە بێ کارەبا ماون.

هێرش و پەلاماردانی فڕۆکە جەنگییەکانی سوپای توركیا بۆ سەر خاکی هەرێمی کوردستان بە بیانووی هەبوونی هێزەکانی پەکەکە لە باکووری عێراق و لە سەر خاکی هەرێمی کوردستان ماوەی چەند ساڵێکە بەچڕی بەردەوامە و بەهۆیەوە تا ئێستا سەدان هاوڵاتی شەهید و برینداربوون.