بەپێی هەواڵی کوردپرێس، بەڕێوەبەری شارۆچکەی کانی ماسێ بە تۆڕی میدیایی رووداوی راگەیاندووە: بەرەبەیانی ئەمڕۆ چوارشەممە 13-05-2020 بۆ شەوی سێیەم لەسەریەک تۆپخانەکانی تورکیا ناوچەکانی بەرواری باڵا تۆپباران دەکەن، شەوی رابردوو چەند گوللەتۆپێک لە نزیک گوندی کێستە کەوتوون. لە دوو شەوی رابردووش گوندی چەلکێش تۆپباران کراوە و زیانی ماددی بەر چەند خێزانێک کەوتووە.

سەبارەت بە زیانەکان، سەربەست سەبری بەڕێوەبەری شارۆچکەی کانی ماسێ دەڵێت: زیانی گیانی نەبووە، بەڵام بەهۆی نزیکی شوێنی تۆپباران کردنەکە زیان بەر 12 خێزان کەوتووە و بەشێکیان پەنجەرە و دەرگا و بەشێکی دیکەیان موڵک و رەزەکانیان زیانیان بەرکەوتووە. هەروەها تۆپبارانەکە ترس و دڵەڕاوێکی لەنێو دانیشتووانی گوندەکانی دیکەش دروست کردووە.

بەهۆی بوونی بارەگاکانی پارتیی کرێکارانی کوردستان (پەکەکە)؛ تورکیا تۆپباران و بۆردوومانی چەند ناوچەیێکی هەرێمی کوردستان دەکات، بە تایبەت قەزای ئامێدی کە جگە لە زیانی ماددی تاوەکوو ئێستا 23 کەس کوژراون.

کۆدی هەواڵنێر: 60113