کوردپرێس: ڕۆژی پێنجشەممە ۱۲ی ئاداری ۲۰۲۰ هێنیس پلاسخارت نێردەی تایبەتی نەتەوەیەکگرتووەکان لە عێراق (یۆنامی) لە راگەیەندراوێکدا ئیدانەی هێرشی شەوی ڕابردووی سەر بنکەی سەربازیی تاجی کرد کە بەهۆیەوە چەندین کوژراو و برینداری لە نێو هاوپەیمانیی دژ بە داعش لێکەوتەوە.

ناوبراو ئاماژەی بەوەش کرد کە ئەو هێرشە بەردەوامانە هەڕەشەی ڕوون و گەورەن لەسەر وڵات و تا ئێستاش کارە مەترسیدارەکانی گرووپە چەکدارەکان سەرچاوەی نیگەرانیی بەردەوامیی نەتەوە یەکگرتووەکانە.
یۆنامی ئەوەشی خستەڕوو کە ئەو هێرشانە جگە لەوەی هەڕەشەن بۆ ئاسایشی وڵات دەبێتە هۆی ئەوەی سەرەنج و گرنگیدانی سیاسییەکان لەسەر کاروبارەکانی ناوخۆی وڵات دوور بکاتەوە و عێراق بکات بە مەیدانی ململانێ و تۆڵەسەندنەوە.
هاوکات داوای لە سەرجەم لایەنەکان کرد تا کۆتا سنوور دانبەخۆیاندا بگرن، چونکە ئەوە تاکە رێگەیە بۆ ئەوەی بتوانن بەرەوپێش بچن و داوای لە حکوومەتی عێراقیش کرد هەموو دەسەڵاتی خۆی بخاتەکار بۆ رێگریکردن لە ڕوودانی هێرشی هاوشێوە لە داهاتوودا.
لە کۆتاییی ڕاگەیەندراوەکەدا یۆنامی پرسەی خۆی ئاراستەی کوژراوانی هێرشەکە کرد و هیوای چاکبوونەوەی بۆ برینداران خواست.

کۆدی هەواڵنێر: ٦۰۱۰۳