بەپێی هەواڵی کوردپرێس، بارەگای بارزانی بڵاویکردەوە، پێشنیوەڕۆی ڕۆژی پێنجشەممە 9ی شوباتی 2023 پەیوەندییەكی تەلەفۆنیی لە نێوان ڕەجەب تەیب ئەردۆغان، سەرۆک كۆماری توركیا و مەسعوود بارزانی ئەنجامدرا و تیایدا سەرۆک كۆماری توركیا سوپاسی بارزانی کرد.

ئەوەشی خستوەتەڕوو، سەرۆک كۆماری توركیا سوپاسی مەسعوود بارزانی و هەرێمی كوردستانی كرد بۆ هاوخەمی و هاوسۆزییان لەگەڵ گەلی توركیا، خانەوادە و كەسوكاری قوربانیان و زیانلێكەوتوانی بومەلەرزەكەی چەند ڕۆژی ڕابردووی توركیا.


بەرەبەیانی رۆژی دووشەممەی رابردوو، بەڕێوەبەرایەتیی کارەسات و باری لەناکاوی تورکیا ناسراو بە ئافاد بڵاویکردەوە، بوومەلەرزەیەک بە گوڕی 7.7 پلەی رێختەر شاری مەرەشی لە کوردستانی تورکیا هەژاند. بوومەلەرزەکە زۆربەی ناوچەکەی گرتەوە، لە تورکیا و سووریاش تائێستا گیان لەدەستدانی زیاتر لە 16 هەزار کەس راگەیەنراوە.