کەمپی هۆل زیاتر لە ٧٠ هەزار کەسی تێدایە و بۆمبێکی تەوقیتکراوە
پوختەی هەواڵ
بەپێی هەواڵی کوردپرێس، عەبدولوەهاب ساعدی فەرماندەی دەزگای دژە تیرۆرى عێراق لە دیدارى رافیدەین لە بەغدا دوایین ئاماری هەڵمەتەکانی دژەتیرۆری عێراق دەخاتە ڕوو و دەڵێت: "ئێمە لە ماوەی دوو ساڵی ڕابردوودا ٦٧٤ تیرۆریستمان دەستگیر کردووە و ٢٣٢ تیرۆریستمان کوشتووە، بە یارمەتی فڕۆکەوانی سوپا و هاوپەیمانی نێودەوڵەتی ٧١٠ هێرشمان ئەنجام دا و زیاتر لە ٥٠٠ حەشارگەمان وێران کردووە.
فەرماندەی دەزگای دژە تیرۆرى عێراق راشیگەیاند، ئەمساڵ 70 تیرۆریستیان لە هەولێر و سلێمانی گرتووە کە پێناسی ساختەیان بۆ خۆیان کردووە.
ناوبراو زیاتر لەبارەی کەمپی هۆل لە کوردستانی سووریا کە بنەماڵەی چەکدارانی داعشی تێدا جێگیرن دەڵێت: کەمپی ئەلهۆل زیاتر لە ٧٠ هەزار کەسی تێدایە و بۆمبێکی تەوقیتکراوە.
فەرماندەی دەزگای دژە تیرۆرى عێراق باسى لەوەش کرد، ئێستا هاوکارییەکان لەگەڵ هەرێمی کوردستان زۆر نایاب و ناوازەیە و ئۆپەراسیۆنی هاوبەشیان هەیە.
ساعدى جەختی کردەوە، دامەزراوەی ئەمنی دوورە لە رکابەریی سیاسی و ئەوان لەژێر فەرمانەکانى فەرماندەی گشتی هێزە چەکدارەکاندان.
بۆچوونی بەکارهێنەران