بەپێی هەواڵی کوردپرێس، دەستەی ھاوسەرۆکایەتی تەڤگەری ئازادی ڕایگه‌یاند، "ھەڤاڵی ھێژامان سوھەیل خورشید ناسراو بە مامۆستا شەماڵ که‌ لەبەردەم ماڵەکەی خۆیدا لە شارۆچکەی کفری تیرۆر کرا، ئەندامی دەستەی بەڕێوەبەرایەتی ئێستا و دیوانی سەرۆکایەتی کۆنگرە بوو لە خولەکانی پێشودا".

هەروەها ته‌ڤگه‌رى ئازادى هه‌ڕه‌شه‌ ده‌کات ‌و ده‌ڵێت:"بێگومان ئەم تیرۆرە ھێرش ‌و دەستدرێژیە بۆسەر بزووتنەوەکەمان‌ و بە دڵنییاییەوە بێ وەڵام نامێنێتەوە".

ته‌ڤگه‌رى ئازادى ده‌ڵێت: "مامۆستا جگە لە ئەرک ‌و بەرپرسیارێتی سیاسی وەکوو کادرێکی فیداکار و ڕەنجدەری تەڤگەرەکەی لە ھەمانکاتدا نووسەر و مێژونووس ‌و جوگرافیاناس ‌و فەرمانبەری فەرمانگەی کشتوکاڵی کفری بووە و جێگە دەست‌ و خزمەتەکانی بێسنوورە و لەبەرچاوە، ھەڤاڵی شەھیدمان ھیچ کێشەیەکی لەبواری ژیانی ‌و کۆمەڵایەتیدا نەبووە، ئەم تیرۆرە، تیرۆری دەوڵەتی داگیرکاری تورکیایە بە ھاوکاریی خیانەتکارانی ناوخۆیی".

هه‌روه‌ک په‌یامێکیش ئاراسته‌ى حکومه‌تى هه‌رێم‌ و ده‌زگا ئه‌منیه‌کانى گه‌رمیان ده‌کات‌و ده‌ڵێت: "ئەم تیرۆرە و تیرۆرەکانی تر پێمان دەڵێت، دوژمنانی گەلی کورد و ئازادی، ئازادانە کردە تیرۆرستیەکانیان ئەنجام دەدەن‌ و دەرباز دەبن، ئەرکی دۆزینەوە و ئاشکرا کردنی بکوژانی مامۆستا شەماڵیش لە گەردنی حکوومەتی ھەرێم‌ و ئاسایش ‌و دەزگا ئەمنیەکانی گەرمیاندایە، پێویستە ھەرچی زووە بکوژان ئاشکرا و دەستگیر بکەن، لەو پێناوەشدا ھەموو ئەرکێکی ھەڤاڵێتی ‌و ئەخلاقی ‌و ویژدانیمان جێبەجێ دەکەین".