بەپێی هەواڵی کوردپرێس، قەیس خەزعەلی، ئەمیندارى گشتیى عەسائیبى ئەهلى حەق لە راگەیێندراوێکدا لەبارەى رووداوەی تۆپبارانەکەی شارى زاخۆ رایگەیاند: "جارێکى دیکە چنگى تورکیا جەستەى عێراقى بریندار کرد و دەستدرێژیی کردە سەر گەشتیارانی بێدەسەڵات لە هاوینەهەوارى پەرەخ لە شارى زاخۆ."

قەیس خەزعەلى گوتی: "خوێنى کوژراوانى ئەو بۆردوومانە خاڵێکى ئابڕووبەرانە دەبێت لەسەر نێوچەوانى هێرشکاران و ئەوانەى بێدەنگن لە بەرانبەر دووبارەبوونەوەى ئەو هێرشانە یان لانیکەم ئەوانەى نەرمى دەنوێنن بۆى."

قەیس خەزعەلی بەرپرسیارێتى پاراستنى هاووڵاتییان و سەروەریی خاکى عێراقى لە هێرشە دووبارەبووەوەکانی تورکیاى خستووەتە ئەستۆى حکوومەتى عێراق و حکوومەتی هەرێمى کوردستان، داوای لە پەرلەمانى عێراق کرد ئەرکى خۆى جێبەجێ بکات بۆ رێگرى لە پێشێل کردنى سەروەریى عێراق بەبێ رەچاوکردنى هەر بەرژەوەندییەکى تەسکى هەر گرووپێک.