بەپێی هەواڵی کوردپرێس، ئەحمەد حاجی ڕەشید ئەندامی خولی پێشووی ئەنجومەنی نوێنەرانی عێراق ڕایگەیاند، بڕیارە 73 پەرلەمانتاری جێگرەوە سوێندی یاسایی بخۆن، پاشان ڕێککارەکانی هەڵبژاردنی سەرۆک کۆمار و پێکهێنانی حکوومەت دەستپێبکات.

بڕوای خۆیشی نیشاندەدات بەوەی “هیچ حکوومەتێک سەرکەوتوو نابێت لە غیابی ڕەوتی سەدر” جگە لەوەی ئەنجومەنی نوێنەران و حکوومەتی ئایندەش شەرعیەتی 32%ی دەنگدەرانیان لەدەستداوە.

ئەو پەرلەمانتارەی پێشوو ئەوەی خستەڕوو، باشترین، ساناترین و بێکێشەترین چارەسەر ئەوەیە چێوەی هەماهەنگی و هاوپەیمانەکانی هەوڵی هەمواری یاسای هەڵبژاردن بدەن لەبەر ڕۆشنایی ڕاسپاردەی دادگای فیدڕاڵی و بڕیاری هەڵوەشاندنەوەی ئەنجومەنی نوێنەران و هەڵبژاردنی پێشوەخت بدرێت.

بڕیارە سبەی ئەنجومەنی نوێنەرانی عێراق بۆ دیاریکردن و سوێندخواردنی پەرلەمانتارانی نوێ لەجێی پەرلەمانتارە دەستلەکارکێشاوەکانی ڕەوتی سەدر کۆ ببێتەوە.