بەپێی هەواڵی کوردپرێس، ھەندرێن محەمەد ساڵح، سەرۆکی کۆمیسیۆنی باڵای سەربەخۆی ھەڵبژاردن و ڕاپرسی لە ھەرێمی کوردستان کە ماوەکەی بەسەر چووە، بۆ ماڵپەڕی فەرمیی پارتی دیموکراتی کوردستان گوتی: "لە ساڵی ٢٠١٩ەوە ئێمە نووسراوێکمان بۆ پەرلەمان کرد لە بارەی بەسەرچوونی کۆمسیۆن بۆ ئەوەی چارەسەریەکمان بۆ بکەن و دواتر نووسراوێکی دیکەمان بۆ پەرلەمان کرد و باسیان لەوەکرد کە دوای کاراکردنەوەی دەستەی مافی مرۆڤ کێشەی کۆمیسیۆن چارەسەر دەکەین، بەڵام ئەویش نەکرا".

ھەندرێن محەمەد ساڵح گوتیشی: "کە دوای دووەم نووسراویش ھیچیان بۆ نەکردین دوای دەرچوونی مەرسوومی سەرۆکایەتی بۆ ئەنجامدانی ھەڵبژاردن جارێکی دیکە نووسراومان بۆ پەرلەمان کردووە، بۆ ئەوەی کێشەی کۆمیسیۆن چارەسەربکەن، بەڵام ئێستاش ھیچیان نەکردووە و ئێمەش ناتوانین ھیچ کارێک بکەین تاوەکوو کێشەی کۆمیسیۆن یەکلایی نەکرێتەوە".