بەپێی هەواڵی کوردپرێس، مەحما خەلیل، بەرپرسی پارتی دیموکراتی کوردستان بە خەندان-ی راگەیاندووە: بەهۆی بوونی هێزی نایاسایی لە سنووری شنگال تائێستا رێککەوتنی نێوان هەردوو حکوومەتی هەرێم و حکوومەتی عێراق لەبارەی ئاسایی کردنەوەی رەوشی قەزاکە و دووبارە ئاوەدان کردنەوەی جێبەجێ نەکراوە.

ناوبراو ئاماژەی بەوەش کرد، لەئێستادا و بەگوێرەی رێککەوتنەکە هێزێکی حکوومەتی فیدڕاڵ لە شنگال جێگیرکراون و جگەلە ئیدارەی خۆجێی و فەرمانگە خزمەتگوزارییەکان، دەیان رێکخراوی نێودەوڵەتیش لەناو شنگال خزمەت پێشکەشکی هاوڵاتیان دەکەن، بەڵام "ئێمە وەک قائیمقام و بەڕێوەبەری بەشێک لەناحیەکان بەهۆی دۆخی نائاسایی و بوونی فرەهێزی، تائێستا نەگەڕاوینەتەوە ناو شارەکە".

مەحما خەلیل ئاماژەی بەوەش کرد، ئەو رێککەوتنە بەهەماهەنگیی حکوومەتی هەرێم جێبەجێ دەکرێت و هاوکار دەبێت بۆ دووبارە بونیاتنانەوەی شارەکە و گەڕانەوەی دانیشتوانە رەسەنەکەی بۆ ناوچەکانیان.

9ی تشرینی یەکەمی ئەمساڵ ئەحمەد مەلا تەڵاڵ، وتەبێژی سەرۆک وەزیران عێراق لە راگەیەنراوێکدا بڵاویکردەوە، بەچاودێری مستەفا کازمی سەرۆک وەزیران رێککەوتنێکی "مێژویی" بەگوێرەی دەستوور ئەنجام دراوە کە پێگەی دەسەڵاتی فیدڕاڵی لە قەزای شنگال بەهێز دەکات و کۆتایی بە پێگەی گرووپە چەکدارییەکان دەهێنێت.

کۆدی هەواڵنێر: 60113