کوردپرێس:

پێشنیوەڕۆی رۆژی پێنجشەممە 11-11-2021، سەلاحەدین محەممەد بەھائەدین، ئەمینداری گشتیی یەكگرتووی ئیسلامیی كوردستان پێشوازیی لە مەهدی شوشتەری، کۆنسوڵی كۆماری ئیسلامیی ئێران لە سلێمانی كرد.

بەپێی راگەیێندراوی نووسینگەی راگەیاندنی ئەمینداری یەکگرتوو، کۆنسوڵی ئێران پیرۆزبایی خۆی و وڵاتەکەیی ئاراستەی ئەمینداری گشتیی یەکگرتوو و سەركردایەتیی ئەو حیزبە كردووە. سەلاحەدین بەهائەدینیش دید و بۆچوونی یەكگرتووی ئیسلامیی كوردستانی لە بەرانبەر چۆنێتیی مامەڵەكردن لەگەڵ رووداوەكان و ئاییندەی عێراق و ناوچەكە روونكردووەتەوە.

لە کۆبوونەوەکەدا ئەمینداری گشتیی یەكگرتوو تیشكی خستووەتە سەر ئەو رووداو و پێشهاتانەی كە روو لە عێراق دەكەن، بەتایبەت لە دوای هەڵبژاردنەكان و لە هەمان كاتیشدا باس لە گرنگیی هەوڵدان بۆ ئارامیی عێراق كراوە "كە پێویستە كۆماری ئیسلامیی هەوڵەكانی بۆ ئەو مەبەستە بخاتەگەڕ، چوونكە ئاڵۆزی و نەبوونی ئارامی لە عێراق، گەلانی عێراق و ناوچەكەش تووشی گرفت دەكات".

هەردوولاش نیگەرانیی خۆیان لە رووداوەكانی چەند رۆژی رابردوو لە عێراق، بەتایبەت ئەو رووداوەی كە بەرامبەر سەرۆكوەزیرانی عێراق ئەنجامدرا، دەربڕیوە و بە "پێشهاتێكی مەترسیدار باس كرا، كە زیانی گەورە بە یەکڕیزیی هێزە عێراقییەكان دەگەیێنێت"، هەروەها جەختیشیان لەوە کردووەتەوە كە پێویستە هەوڵەكان چڕبكرێنەوە "بۆ رێگریكردن لەو هەوڵە مەترسیدارانە".