بەپێی هەواڵی کوردپرێس، میدیا فەرمییەکانی تورکیا لەوان ئانادۆڵۆ و حوڕییەت بڵاویان کردەوە ئەو بەرپرسە باڵایەی پەکەکە کە تورکیا دەڵێت، لە ئۆپەراسیۆنەکەدا کوژراوە ناوی نازلی تاشپینار-ە و ئەندامی کۆنسەی سەرکردایەتیی پارتی کرێکارانی کوردستان بووە.

بەگوێرەی ئەو زانیارییانەی ئاژانسی حکوومەتی تورکیا لە سەرچاوە ئەمنییەکانەوە وەرگیراون، تیمی ئۆپەراسیۆنە تایبەتەکانی دەزگای هەواڵگریی تورکیا (MiT) لە میانی هەوڵەکان بۆ بە ئامانج کردنی بەرپرسە باڵاکانی پەکەکە، دوای چاودێری کردن، شوێنی مانەوەی نازلی تاشپنار، کە لەناو پەکەکە ناوی خوازراوی "ئەمینە ئەرجیەس" بووە، دیاریکردووە و تیمە تایبەتەکە لە ئۆپەراسیۆنێکدا کردوویەتییە ئامانج.

بەپێی زانیارییەکانی میدیای فەرمیی تورکیا، نازلی لە ساڵی 1994دا چووەتە ریزەکانی پەکەکە و لەلایەن عەبدوڵڵا ئۆجەلانەوە مەشقی پێکراوە، لەناو رێکخراوەکەدا چەندین پۆستی هەبووە و لە مەشق و راهێنانی ژنانی ناو رێکخراوەکەدا رۆڵی هەبووە.

تاشپینار دوای ئەنجامدانی چالاکی لە ناوخۆی تورکیا، چووەتە هەرێمی کوردستان و ماوەیەک بەرپرسی گشتیی لقی ژنانی (PAJK) بووە و لەساڵی 2019دا چووەتە ناوەندی بەڕێوەبردنی سەربازیی پەکەکە لە ناوچەی گارە.

تاوەکو ئێستا فەرماندەیی هێزەکانی پاراستنی گەل (هەپەگە)، کە باڵی سەربازیی پارتی کرێکارانی کوردستان (پەکەکە)یە هیچ روونکردنەوەیەکی لەمبارەیەوە بڵاو نەکردووەتەوە.