بەپێی هەواڵی کوردپرێس، لەکۆبوونەوەی بزووتنەوەی گۆڕاندا چوار بڕیار دراوە کە یەکێکیان ئەنجامدانی کۆڕ و کۆبوونەوەی فراوان لەگەڵ گۆڕانخوازان بۆ دروست کردنی بڕیاری دەستەجەمعی و دەستپێکی قۆناغی هەستانەوە.

دەقى راگەیەنراوەکە:

راگەیەندراوی جڤاتی نیشتمانی بزووتنەوەی گۆڕان

ئەمڕۆ چوارشەممە، ١٣ی ١٠ی ٢٠٢١، جڤاتی نیشتیمانی بزووتنەوەی گۆڕان لە مەکۆی سەرەکی کۆبوونەوەیەکی نائاسایی ئەنجامدا و تێیدا:

یەکەم: وەک دروست کردنی پێشینەیەکی سیاسی نوێ و ڕچەشکێن، ڕێکخەری گشتی و ئەندامانی خانەی ڕاپەڕاندن دەستلەکارکێشانەوەیان پێشکەش کرد و بەرپرسیارێتی ئەم قۆناغەیان لە ژیانی سیاسی لە ئەستۆگرت تا دروستکردنی دەستەیەکی کاتی بۆ بەڕێوەبردنی بزوتنەوەکە و ئامادەکاری کۆنفرانسی نیشتیمانی، ئەمەش هەنگاوێکە جێگای نرخاندنی بەرزە و وەڵامی ڕاستەوخۆی ئیرادەی گۆڕانخوازانە بۆ گۆڕانکاری.

دووەم: ستراتیژی بنیاتنانەوەی پایەکانی قۆناغی نوێ لە رێگەی داڕشتنەوەی بنەماکانی خەباتی سیاسی، دیپلۆماسی، ڕێکخراوەیی، میدیایی، گوتاری سیاسی و پرسی بەشداری گۆڕان لە حكوومەتدا بڕیاریان لێ درا.

سێیەم: ئەنجامدانی کۆڕ و کۆبوونەوەی فراوان لەگەڵ گۆڕانخوازان بۆ دروست کردنی بڕیاری دەستەجەمعی و دەستپێکی قۆناغی هەستانەوە. هاوکات بۆ نرخاندنی توانا و پەرۆشی ئەو خەڵکانەی لە قۆناغێک لە قۆناغەکاندا هاوکار و پاڵپشتی بزووتنەوەی گۆڕان بوون، یان نوێنەرایەتیان کردوە و زیانیان بە بزووتنەوەکە نەگەیاندوە؛ پەیوەندیان لەگەڵ بکرێت و ببنەوە بە بەشێک لە ستراتیژی بنیادنانەوە و داڕشتنەوەی متمانە.

چوارەم: ڕاستە بزووتنەوەی گۆڕان بەشێوەیەکی کاتی نوشستی خواردوە، بەڵام هەموو گۆڕانخوازان دڵنیا دەکەینەوە؛ هەڵەکان راست دەکەینەوە و ئیرادەی بەخۆداچونەوە و چاکسازی و گۆڕانکاری خەڵکی کوردستان سەردەکەوێ.