بەپێی هەواڵی کوردپرێس، سەڵاحەدین محەمەد بەهائەدین، ئەمینداری یەکگرتووی ئیسلامیی کوردستان رایگەیاند، "پرۆسەی هەڵبژاردن باشترین بەرهەمی عەقڵی مرۆڤ و تاکە بژاردەی مەشرووع، شارستانی و گونجاوە بۆ دیاری کردنی نوێنەرانی خەڵک لەسەنتەری بڕیار و یاسادانان و ئیدارەی وڵاتدا، بۆیە داوا لە هاوڵاتیان دەکەن بەپاساوی گلەیی و بێ زاری بایکۆتی پرۆسەکە نەکەن، چوونکە بەوە لە مافێکی یاسایی خۆیان مەحرووم دەکەن و لەئەرکێکی شەرعی خۆتان دوا ئەکەون و فرسەت بەکەسانی نەشارەزاو لێ نەهاتوو ئەدەن نوێنەرایەتیتان بکات."

ئەمینداری گشتیی یەکگرتوو لەپەیامێکدا باسی لەوەش کردووە، "یەکێک لەپیلانی گەندەڵکاران و خەڵکە نابەرپرسەکان ئەوەیە کە هەوڵ ئەدەن هاوڵاتیان بێ هیوا بکەن لە گۆڕانکاری و دەیانەوێ مەئیوسیان بکەن لە چاکسازی و ناچار بکرێن بەڕازی بوون بە نادادی و واقعی چەقبەستووی سەقەت، هەڵبژاردن هەنگاوێکی بنەڕەتیە لە پرۆسەی گۆڕانکاری و چاکسازیدا و ئەمڕۆ بەدیلی نیە لە کۆمەڵگەی ئێمەدا."

ئاماژەی بەوەش کردووە، "سەلامەتی بانگەشەی هەڵبژاردن و دووری لە توندوتیژی لە هەڵمەتی ئەم پرۆسەیەدا جێگای دڵخۆشیە و بایەخی خۆی هەیە. ڕکابەری و منافەسەی هەڵبژاردن سروشتیە و بەمانای ناحەزی و دوژمنایەتی نیە. بەشەیتان کردنی یەکتر ڕەوشتێکی دواکەوتووە و سیاسەت نابێ خاڵی بکرێتەوە لەبەهاو ئەخلاق."

ئەمینداری گشتیی یەکگرتوو ئەوەشی خستوەتەڕوو، داوا دەکەن سەرجەم هاوڵاتیان و چاکسازی خوازان "بەتێکڕا ئەم هەڵبژاردنە ڕۆژی 10/10 بکەینە کەرنەڤاڵی بەرەو چاکسازی ڕاستەقینە و گۆڕانکاری ڕیشەیی و سەقامگیری سیاسی و ئابووری".