بەپێی هەواڵی کوردپرێس، بەسێ هۆزات، فەرماندەی باڵای ژن لە پارتی کرێکارانی کوردستان لە پەراوێزی ڕێوڕەسمی چەکدانانی پەکەکە لە سلێمانی بە ئاژانسی هەواڵی فرانس پرێسی ڕاگەیاند: پەکەکە چیدی بوونی نەماوە و ئەگەر تورکیا هەنگاوی کرداری بنێت، یاسا دەربکات و چاکسازیی یاسایی ڕیشەیی بکات، دەچینەوە تورکیا و بەشداری لە سیاسەتدا دەکەین.

بەبێ گەرەنتی یاسایی و دەستوری، گەڕانەوەیان ئەستەم دەبێت

ناوبراو ئاماژەی بەوەش كرد، ئامادەن و خوازیارن بچینەوە تورکیا بۆ ئەوەی سیاسەتی دیموکراسی بکەن و درێژە بە تێکۆشانیان لەپێناو ئازادی و دیموکراسیدا بدەن، بەڵام بەبێ گەرەنتی یاسایی و دەستووری، گەڕانەوەیان ئەستەم دەبێت.

بەبێ رێککەوتن زیندانی دەکرێین یان دەکوژرێین

بەسێ هۆزات باسی لەوەش كرد: "ئەگەر رێککەوتنی یاسایی و دەستوری نەبێت، یان زیندانی دەکرێین یان دەکوژرێین. دەبێت گەرەنتی گەڕانەوەی گەریلاکانی پەکەکە بۆ تورکیا بکرێت".

ئازادیی جەستەیی ئۆجەلان داواکاریی یەکەمیانە

هاوسەرۆکی کەجەکە ئەوەشی خستەڕوو: ئازادیی جەستەیی عەبدوڵا ئۆجەلان لە رێگەی گەرەنتیی یاساییەوە شتێکی بنەڕەتییە، ئەوە مەرجی سەرەکی و داواکاریی یەکەمیانە. بەبێ ئەو پێشهاتە، ئەستەمە پڕۆسەکە بە سەرکەوتویی بەردەوام بێت.