بەپێی هەواڵی کوردپرێس، ئەمڕۆ هەینی، ۱۳ـی حوزەیرانی ۲۰۲۵، وەزارەتی دەرەوەی ئێران لە ئێکس راگەیێندراوێکی سەبارەت بە بۆردوومانەکەی ئیسرائیل بڵاوکردەوە کە تێیدا هاتووە: "ڕژێمی زایۆنی نەیدەتوانی هێرشەکە بەبێ هاوئاهەنگی و پەسندکردنی لەلایەن ئەمریکاوە بکات"؛ دەشڵێت: "حکوومەتی ئەمریکا وەکوو پاڵپشتیکاری سەرەکی ئەو رژێمە، ڕووبەڕووی بەرپرسیاریەتی تووند" دەبێتەوە. 
 وەزارەتی دەرەوەی ئێران لە راگەیێندراوەکەیدا دەشڵێت: "رژێمی زایۆنی پێشێلی یەکگرتوویی خاک و سەروەری نیشتمانیی ئێرانی ئازیزمانی کرد"؛ وتیشی: "ئێران مافی رەوا و یاسایی هەیە بۆ وەڵامدانەوەی ئەم شەڕەنگێزییە".
وەزارەتی دەرەوەی ئێران هەروەها داوای لە ئەنجوومەنی ئاسایش کرد "هەنگاوی دەستبەجێ بەرامبەر ئەو پێشێلکارییە ئەمنی و ئاسایشی نێودەوڵەتییە بنێ" و رایگەیاند: "داوا لە سەرۆک و هەموو ئەندامانی ئەنجوومەن دەکەین بەبێ دواکەوتن کار لەسەر ئەم پرسە بکەن".