بەپێی هەواڵی کوردپرێس، فازڵ میرانی، به‌رپرسی ده‌سته‌ی کارگێڕیی مه‌کته‌بی سیاسیی پارتی دیموکراتی کوردستان، لەمیانی دیدارێکی تەلەفزیۆنی لەگەڵ کەناڵی ئەلشەرقیە نیوز، تیشکی خستەسەر نوێترین پێشهاتەکانی ناوچەکە و عێراق و هەرێمی کوردستان و لەبارەی هەوڵەکانبۆ پێکهێنانی حکوومەتی نوێی هەرێمی کوردستان ئاشکرای کرد: گفتوگۆکان لەنێوان دوو حیزبە سەرەکییەکەی کوردستان لەپێناو پێکهێنانی حکومەت، بەردەوامە.

ناوبراو زیاتر وتیشی: ئەنجامی هەڵبژاردن ئەوەی یەکلاکردووەتەوە کە سەرۆکی حکوومەت هی براوەی یەکەمی هەڵبژاردن بێت و دەنگەکانی پارتی بەتەنها لەکۆتا هەڵبژاردن هاوتای دەنگی سەرجەم حیزب و لایەنەکانی دیکەیە.

میرانی وتیشی: جار هەیە ڕێککەوتنی ئەرزی واقیع پابەندمان دەکات لایەنێک کەمتر لەبەشی ڕاستەقینەی خۆی پێبدرێت.

ناوبراو دەشڵێت: پشکی سەرۆکی هەرێمی کوردستان لەبەرامبەر دانووستانەکانی وەرگرتنی پۆستی سەرۆککۆماری عێراقە و ئەوە ڕێککەوتنێکی تایبەتی نێوان پارتی و یەکێتییە و پێشتر یەکلاکراوەتەوە، بۆ هەر دۆخێکی نوێش قسەی نوێ دێتە کایەوە.

فازل میرانی ئاماژەی بەوەدا، پێویستە بەرپرسانی باڵای بەغدا ئەوە بزانن کە کورد تەنها لەپێناو مووچە و دەستکەوتی ماددی خەباتی نەکردووە، "بەڵکوو بۆ ئەوە خەباتمان کردووە لە عێراقدا هاوبەش و یەکسان بین"، بەداخەوە هێشتا جۆرێک بیرکردنەوەی شۆڤێنی هەیە کە سیستمی فیدڕاڵی و هاوبەشیی کورد لە پرۆسەی سیاسی عێراقی پێ هەزم ناکرێت.