بەپێی هەواڵی کوردپرێس، ڕەجەب تەییب ئەردۆغان، سەرۆک کۆماری تورکیا، لەبارەی لێدوانەکەی مەنسوور یاڤاش، سەرۆکی گەورەشارەوانی ئەنقەرە کە گوتبووی، کورد لە نەورۆزدا "پەرۆیان" هەڵکردبوو؛ رایگەیاند: ئەم دژایەتییە گەورەی ئۆپۆزسیۆن بۆ کورد و نەورۆز، لەلایەن برا کوردەکانییانەوە بە هەند وەرگیراوە، گوتیشی، لەگەڵ نزیکبوونەوەیان لە ئامانجی تورکیایێکی بێ تیرۆر، شاهیدی زیاتری ئەم جۆرە قسە بێمانایە دەبن.

هەینی ۲۱ـی ئاداری ۲۰۲۵، ڕەجەب تەییب ئەردۆغان، سەرۆک کۆماری تورکیا، لە ئاهەنگی جەژنی نەورۆزدا، گوتارێکی پێشکەش کرد و ئاماژەی بەوە دا، ۲۱ـی ئادار دەکەینە ڕۆژی برایەتی، هەموومان پێکەوە ئەو هەنگاوە دەنێن و کاری لەسەر دەکەین، هەروەها ئەوانەی بڕوایان بە نەورۆز هەیە هەرگیز ناڕوخێن.

سەرۆک کۆماری تورکیا، دەشڵێت: ئێمە لەسەر پێی خۆمان دەوەستین و هەرگیز کۆڵ نادەین، ئەو پەیامەی کە لە نەورۆزدا هەیە پێویستە بەرەو پێشی ببەین، گوتیشی: هیوادارین نەورۆز ببێتە هۆی ئاشتی و ئارامی بۆ وڵات.