بەپێی هەواڵی کوردپرێس، دەستەی بەڕێوەبەری ناوەندیی دەم پارتی لە بارەی گرتنی ئەکرەم ئیمام ئوغلوەوە، لە راگەیەندراوێكدا دەڵێت: "خەڵكێكی زۆر لە نێویاندا ئەكرەم ئیمامئۆغڵو، سەرۆكی گەورەشارەوانیی ئیستەنبووڵ، رەسوڵ ئەمراهـ شاهان، سەرۆكی شارەوانی شیشلی، كارگێڕانی شارەوانی و رۆژنامەوان دەستبەسەركراون. هەموو ئەم كردانە بە تەواوەتی كردەوەی كوودەتاچین".

لە درێژەی راگەیاندنەکەدا دەم پارتی دەڵێت: "توركیا لە قۆناغێكدا دەژی كە پڕۆسەیەكی كوودەتای مەدەنی دەسەڵاتی دادوەری و حكوومەت بە هاوبەشی بەرهەمهێنراو هەموو ئۆپۆزسیۆنێكی سیاسی و كۆمەڵایەتی دەكاتە ئامانج".

دەم پارتی دەشڵێت: "بڕیاری دەستبەسەركردنەكە نایاسایی و دژە دیموكراسییە كە ساڵانێكە دژی پارتەكەشمان پیادە كراوە".

دوو ڕۆژ لەمەوبەر ئەکرەم ئیمامئۆغڵو، سەرۆکی گەورەشارەوانیی ئیستەنبووڵ لەسەر ڕاسپاردەی داواکاری گشتیی ئیستەنبووڵ بە تۆمەتی هاوکاری کردنی پەکەکە/کەجەکە و گەندەڵی دەستبەسەرکرا.

 لە چوارچێوەی لێکۆڵینەوەکاندا بێجگە لە ئیمامئۆغڵو، فەرمانی دەستبەسەرکردن بۆ زیاتر لە ۱۰۰ کەسی دیکە دەرکراوە.