بەپێی هەواڵی کوردپرێس، لەبارەی ئەم هەوڵانەوە هاوسەرۆکی دەستەی پەیوەندییەکانی دەرەوەی بەڕێوەبەرایەتیی خۆسەر ڕایگەیاند، دانووستانەکان لەبارەی  ناوچەی داماڵراو لە چەک بەردەوامن و پێشنیازکراوە هێزەکانی ئەمریکا و فەڕەنسا ئاسایشی ئەو ناوچەیە لە ئەستۆ بگرن.

ئاژانسی رۆیتەرز بڵاویکردەوە، ئیلهام ئەحمەد داوای لە فەڕەنسا کردووە هێز ڕەوانە بکات بۆ پاراستنی ناوچەی لە چەکداماڵراو،  پاراستنی ناوچەکە و دروستکردنی پەیوەندییەکی باش لەگەڵ تورکیا.

رۆیتەرز ئاشکراشی کردووە، تاوەکوو ئێستا وەزارەتە پەیوەندیدارەکانی تورکیا و فەڕەنسا وەڵامی داواکارییەکەی بەڕێوەبەرایەتیی خۆسەرییان نەداوەتەوە و ئەمریکاش هیچی لەوبارەیەوە نەگوتووە.

ئیلهام ئەحمەد ئاماژەی بەوەش کردووە، ئەگەر فەڕەنسا بتوانێت تورکیا بەم پێشنیازە ڕازی بکات دەستبەجێ پرۆسەی ئاشتی دەستپێدەکەن.

تورکیا بەبیانووی پاراستنی سنوورەکان و بوونی پەیوەندی لەگەڵ پەکەکە، بەڵێنیداوە کۆتایی بەهێزەکانی پاراستنی گەل (YPG) لە سووریا بهێنێت کە بەشێکی سەرەکیی هەسەدە پێکدەهێنن.

ئێستا ئەو وڵاتە هێزێکی زۆری لەسەر سنووری کۆبانێ کۆ کردووەتەوە و هەڕەشەی هێرشکردنەسەری دەکات، هەسەدەش پێشنیازی کردووە بۆ رێگری لە دروستبوونی شەڕ، کۆبانێ بکرێتە ناوچەیەکی لەچەکداماڵراو بەڵام تا ئێستا تورکیا بەو پێشنیازە ڕازی نەبووە.