بەپێی هەواڵی کوردپرێس، وەزارەتی دەرەوەی تورکیا له‌ نامه‌که‌دا که‌ به‌بۆنه‌ی هه‌ڵبژاردنه‌وه‌ به‌ ئه‌میندار ئاڕاسته‌ی  سەلاحەدین بەهائەدینی کردووه‌، ڕایگه‌یاندووه‌، "هیوادارین نۆیەمین کۆنگرەی یەکگرتووی ئیسلامی کوردستان ببێتە مایەی خێر و خۆشی، بەبۆنەی دووبارە هەڵبژاردنەوەتان وەکوو ئەمینداری گشتی پارتەکەتان، سڵاو و پیرۆزبایی جێگری وەزیری دەرەوەی کۆماری تورکیا (بەرێز نوح یڵماز) بەرێوەبەری گشتی و باڵیۆز علی رەزا گونەیتان پێدەگەیەنم".

ئاماژه‌ی به‌وه‌ش کردووه‌، "لە نێو ئەو بارودۆخە هەستیارەی کە ناوچەکە پێدا تێپەردەبێت، ئەزموونی سەرکردایەتیتان بەهایەکی مەزن دەبێت بۆ بەهێزکردنی بنچینەی پەیوەندی و بەرژەوەندییە هاوبەشەکانی نێوان تورکیا و هەرێمی کوردستانی عێراق و پەیوەندیە مرۆڤایەتیەکان".

شایانی باسە ۲۷ی ئه‌م مانگه‌، له‌ نۆیه‌مین کۆنگره‌ی یه‌کگرتووی ئیسلامی کوردستاندا، سه‌لاحه‌دین محه‌مه‌د به‌هائه‌دین زۆرینه‌ی ده‌نگی ئه‌ندامانی کۆنگره‌ی به‌ده‌ست هێنا و به ‌ئه‌مینداری گشتی ئه‌و حزبه‌ هه‌ڵبژێردرایه‌وه‌.