بەپێی هەواڵی کوردپرێس، حکوومەتی هەرێمی کوردستان لە ڕاگەیێندراوێکدا لەبارەی پەیوەندییە تەلەفۆنییەکە دەڵێت: "گفتوگۆ لەبارەی دوایین پێشهات و گۆڕانکارییەکانی عێراق و هەرێمی کوردستان و ناوچە کرا، جەخت لە پەرەپێدانی پەیوەندیی دوولایەنە و پاراستنی ئاسایش و سەقامگیری کرایەوە."

سەرۆکی حکوومەت پیرۆزبایی لە کۆنگرێسمانەکە کردووە بەبۆنەی دەستنیشان کردنی بۆ ئەو پۆستە لە ئیدارەی داهاتووی ئەمریکا و "ستایشی تێگەیشتنی قووڵی ئەوی لە بابەتە ئەمنی و پەیوەندیدارەکانی ناوچەکە کرد."

لە ڕاگەیێندراوەکەی حکوومەتدا هەروەها هاتووە، هەردوولا "بیروڕایان لەبارەی ئەنجامەکانی هەڵبژاردنەکانی ئەم دواییەی هەرێمی کوردستان و ئەمریکا ئاڵوگۆڕ کرد و، جەختیان لە گرنگیی گۆڕانکاریی دیموکراسییانە و پتەوکردنی هاریکاری و هاوئاهەنگی نێودەوڵەتی لەمبارەیەوە کردەوە."

بەشێکی دیکەی گفتوگۆکان وەک لە ڕاگەیێندراوەکەدا هاتووە: "تایبەت بوون بە رۆڵی گرنگی هەرێمی کوردستان وەک هاوبەشێکی جێی متمانە لە ناوچەکە و، پابەندبوون بە بەها و ئامانجە هاوبەشەکانی ئاشتی و ئاسایش. هەردوولا هاوڕابوون لەسەر گرنگیی هەوڵە هاوبەشەکان بۆ ڕووبەڕووبوونەوەی ئاستەنگ و ئاڵنگارییەکان و دڵنیابوون لە بەردەوامبوونی سەقامگیری".