بەپێی هەواڵی کوردپرێس، مەكتەبی سیاسی پارتی لە ڕاگەیەنراوەكەدا ڕایگەیاند "سەبارەت بە گۆڕانکاری و ڕووداوی ئەمڕۆی وڵاتی سووریا، ئێمە لە پارتی دیموکراتی کوردستان، ڕێز لە بژاردە و ئیرادەی گەلانی سووریا دەگرین".

هەروەها ڕایگەیاند: "هیوادارین قۆناغی داهاتوو، قۆناغی خۆشی و ئارامی و کۆتاییهاتنی ئاڵۆزییەکان و سەرەتایەکی نوێ بێت لە پێکەوەژیان و یەکترقبووڵکردنی گشت پێکهاتەکانی ئەو وڵاتە، هەروەها ژینگەیەکی لەبار و دەرفەتی گونجاوی سەردەمیانە بڕەخسێت بۆ ژیانێکی شایستە بە گەلانی سووریا لە هەموو ڕوویەکەوە".

مەكتەبی سیاسی پارتی لە ڕاگەیەنراوەكەدا ئاماژەشی دا: "لەلایەکی دیکەوە هیوادارین ئەم گۆڕانکارییە کاریگەری ئەرێنی لە پەیوەندییەکانی دەرەوەی سووریا و ڕەنگدانەوەی باشی هەبێ لە چارەسەری کێشە و گرفت و پەرەسەندنەکانی ئەم چەند ساڵەی دوایی لە سەرتاسەری ناوچەکە".

جەختیشی كردەوە "هیوداراین زمانی دیالۆگ ببێتە بنەمای سەرەکی بۆ چارەسەری گشت کێشەکان و ڕێز لە ئیرادە و خواستی گەلان بگیرێ".