سەرۆکی بەرەی تورکمانی عێراق ئیدیعا دەکات بۆ سەرژمێری ۲۶۰ هەزار کورد براونەتە کەرکووک
پوختەی هەواڵ
سەرۆکی بەرەی تورکمانی عێراق ڕایگەیاند، مەبەستی گۆڕینی دیموگرافیای کەرکووک، پێش ئەنجامدانی سەرژمێری گشتی دانیشتوان، ۲۶۰ هەزار کەس لە هەولێر و سلێمانیەوە هێنراونەتە ئەو شارە.
بەپێی هەواڵی کوردپرێس، حەسەن توران، لە لێدوانێکی ڕۆژنامەوانیدا ڕایگەیاند، بینیویانە کە بەر لە ئەنجامدانی سەرژمێری گشتی، لە شارەکانی هەولێر و سلێمانییەوە ژمارەیەکی زۆر خێزان هێنراونەتە کەرکووک.
ئاماژەی بەوەش کرد، "تورکمانەکان پشتیوانی لە ئەنجامدانی سەرژمێری گشتی لە سەرانسەری عێراقدا دەکەن، دیموگرافیای کەرکووک لە دوای ۲۰۰۳وە گۆڕانکاری بەسەردا هات، بەر لە سەرژمێری ۲۶۰ هەزار کەس لە دەرەوەی شارەکە هێنراون و لەسەر نفوسی کەرکووک تۆمارکراون".
سەرۆکی بەرەی تورکمانی باسی لەوەش کرد، "هەوڵێکی جددی هەیە بۆ گۆڕینی دیموگرافیای کەرکووک و تێکدانی شوناسی تورکمانیی شارەکە، بۆیە پێویستە ئەنجامەکانی سەرژمێریی گشتی کەرکووک دوابخرێت تا وردبینی لەسەر بنەمای سەرژمێرییەکەی ساڵی ۱۹۵۷ دەکرێت".
بۆچوونی بەکارهێنەران