بەپێی هەواڵی کوردپرێس، گارۆ پایلان، پەرلەمانتاری پارتی دیموکراتی گەلان (HDP) لە پەرلەمانی تورکیا ڕایگەیاند: حکوومەت باجی لەسەر بەنزین، کەلوپەل، خۆراک، کارەبا و گازی سروشتی زیاد کردووە، کە ئەمە گەورەترین زیانە بۆ هەژاران، چوونکە هەژاران بەردەوام پێویستیان بەو شتانەیە، بەڵام باج لەسەر دەوڵەمەندەکان زیاد ناکات.

ناوبراو وتیشی: ناکرێت و بێویژدانییە دەوڵەمەند باجی لەسەر زیاد نەکرێت و کۆمپانیاکان باجیان لەسەر زیاد نەکرێت، بەڵام لەسەر هەژاران زیاد بکرێت و پارەی ئەو باجەش بدەیت بەو میدیاکارەی سەر بە خۆتن.

ئەو پەرلەمانتارەی هەدەپە ئاماژەی بەوەش کرد: "رەجەب تەیب ئەردۆغان سەرکۆماری تورکیا داوای گەردن ئازایی لە هاووڵاتییان کردووە، پێم بڵێن بەو شێوەیە داوای گەردن ئازایی دەکەیت؟ هەژارەکان چۆن گەردنت ئازا دەکەن؟"

گارۆ پایلان گوتیشی: تورکیا کەوتووەتە دۆخێکەوە، کە هاووڵاتییانی ناتوانن سکی خۆیان تێر بکەن و بژیو و ڕەوشی ژیانیان رۆژ بە رۆژ بەرەو خراپی دەچێت.

سەرچاوە: باسنیووز

کۆدی هەواڵنێر: 60113