بەپێی هەواڵی کوردپرێس، ناوەندی ڕاگەیاندن و چاپه‌مه‌نیی هێزەکانی پاراستنی گەل (HPG) ناسنامەی ئەو دوو گەریلایەی بڵاو کردەوە، کە لە ڕۆژی ۶ی ئەیلوولی ۲۰۲۴ لە ناوچەی گارە لە هەرێمی کوردستان لە شەڕ و پێکدادان لە دژی سوپای تورکیا، لە چوارچێوەی ئۆپەراسیۆنی ناسراو بە چنگ – قوفڵدا گیانیان لەدەست‌دابوو.

ناسنامەی گەریلاکان بەم شێوەیەن: خەلیل ئیگیت ناسراو بە هۆگر پیرۆسی لەدایکبووی شرنەخ و محەممەد ڕەشید ناسراو بە مەزڵوم پارتیزان لەدایکبووی عەفرین.

خەلیل ئیگیت ناسراو بە هۆگر پیرۆسی

محەممەد ڕەشید ناسراو بە مەزڵوم پارتیزان

ڕۆژی ۱۴ی ئەیلوولی ۲۰۲۴، ناوەندی چاپەمەنی و ڕاگەیاندنی هێزەکانی پاراستنی گەل (هەپەگە)، کە باڵی سەربازیی پەکەکەیە، لە ڕاگەیێندراوێکدا بڵاویکردەوە، چوار جار هێرشیان کردووەتە سەر هێزەکانی تورکیا و بەهۆیەوە دوو سەرباز کوژران و سەربازێکی دیکەش برینداربووە.

رۆژی ۱۵ی ئەیلوول، وەزارەتی بەرگریی تورکیا لە راگەیێندراوێکدا بڵاویکردەوە لە ئۆپەراسیۆنێکی ئاسمانیدا دوو گەریلای پەکەکە لە رێگەی فڕۆکە جەنگییەکانی ئێف ۱۶ و درۆنەکانیانەوە لە ناوچەکانی مەتین و گارا لە خاکی هەرێمی کوردستان کردووەتە ئامانج.

ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی ۱۸ـی نیسانی ۲۰۲۲ لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.