به‌وته‌ى سه‌رچاوه‌یەکى ناو پارتى دیموکراتى کوردستان، ئه‌و حزبه‌ بڕیاری داوه‌ بۆ هه‌ڵبژاردنى خولى شه‌شه‌مى په‌رله‌مانى کوردستان، هه‌ر له‌و چوار پارێزگایه‌ى هه‌ڵبژاردنیان تێدا دەکرێت هه‌ڵمه‌تێکى چڕى هه‌ڵبژاردنى تێدا ئه‌نجام بده‌ن‌ و بۆ ئه‌وه‌ش به ‌بڕیارى مه‌سعوود بارزانى بڕیاردراوه‌ "خه‌ڵکى کاریگه‌ر و خاوه‌ن ده‌سه‌ڵات بنێرنه‌ پارێزگاکان".

به‌وته‌ى سه‌رچاوه‌ باڵاکه‌، "سه‌رکردایه‌تى پارتى بڕیاری داوه‌، سه‌رپه‌رستى هه‌ڵمه‌تى بانگه‌شه‌ى هه‌ڵبژاردن له ‌پارێزگاى هه‌ولێر و ئیداره‌ى سه‌ربه‌خۆى سۆران ‌و ده‌وروبه‌رى به‌ نێچیرڤان بارزانى سه‌رۆکى هه‌رێم‌ و هاوکات جێگرى سه‌رۆکى پارتى بسپێردرێت".

ئه‌وه‌شى وت: "سه‌رپه‌رستى هه‌ڵمه‌تى بانگه‌شه‌ى هه‌ڵبژاردن له ‌پارێزگاکانى سلێمانی ‌و هه‌ڵه‌بجه ‌و ئیدارەکانى گه‌رمیان‌ و ڕاپه‌ڕین به ‌مه‌سروور بارزانى سه‌رۆکى حکوومه‌ت ‌و جێگرى سه‌رۆکى پارتى‌ سپێردراوه‌".

بۆ سنوورى ده‌ڤه‌رى بادیانیش به‌گوێره‌ى وته‌ى سه‌رچاوه‌ باڵاکه‌ى پارتى: "پارتى بڕیاری داوه‌ مه‌نسوور بارزانى فه‌رمانده‌ى هێزى تایبه‌تى گوڵان سه‌رپه‌رستى هه‌ڵمه‌تى بانگه‌شه‌ى هه‌ڵبژاردن له ‌پارێزگاى دهۆک‌ و ئیداره‌ى سه‌ربه‌خۆى زاخۆو ده‌وروبه‌رى بکات".

ئه‌و سه‌رچاوه‌ باڵایه‌ى پارتى دیموکراتى کوردستان جه‌ختیشی کرده‌وه‌، "تائێستا و دواى کۆبوونه‌وه‌ى سه‌رکردایه‌تى پارتى، بڕیارەکه‌ به‌مشێوه‌یه‌یه‌ بۆ هه‌ڵمه‌تى هه‌ڵبژاردنى خولى شه‌شه‌مى په‌رله‌مانى کوردستان، به‌ڵام ئه‌گه‌ر لە کۆبوونه‌وه‌ى هه‌فته‌ى داهاتوودا بڕیارەکان بگۆڕدرێن ئه‌وه‌ بابه‌تێکى دیکه‌یه‌".