بەپێی هەواڵی کوردپرێس، لەتیف جەمال ڕەشید، سەرۆک‌کۆماری عێراق نووسراوێکی ئاڕاستەی موحسین مەندەلاوی، سەرۆکی بەوەکالەتی پەرلەمانی عێراق کردووە و تێیدا داوای کردووە، پرۆژە یاسای بەپارێزگابوونی هەڵەبجە بخەنە خشتەی کاری دانیشتنەکانی داهاتووی پەرلەمانەوە بۆ ئەوەی لەلایەن پەرلەمانتارانەوە دەنگی لەسەر بدرێت.

سەرۆک‌کۆماری عێراق لە نووسراوەکەیدا ئاماژەی بەوەداوە: "لەپێناو بەرژەوەندی گەل و پێزانین و وەفا بۆ خوێنی شەهیدان و ئەو قوربانیانەی گەلی کورد، کە ڕووبەڕووی کیمیاباران و ئەنفال بوونەتەوە داوا دەکەین پرۆژەیاسای بەپارێزگابوونی هەڵەبجە لە پەرلەمان دەنگی لەسەر بدرێت."

لەو بارەیەوە چرۆ حەمە شەریف، پەرلەمانتاری کورد لە پەرلەمانی عێراق لە فراکسیۆنی یەکێتی وتی: "بۆ خوێندنەوەی سێیەم و کۆتایی هێنان بە پرۆژە یاسای بەپارێزگابوونی هەڵەبجە 87 ئیمزای پەرلەمانتارانمان کۆ کردۆتەوە و ئاڕاستەی سەرۆکایەتی پەرلەمانمان کردووە، کە نوێنەری سەرجەم فراکسیۆنەکانی تێدایە و داوامان کردووە خوێندنەوەی سێیەم بۆ بە پارێزگابوونی هەڵەبجە بکرێت و دەنگی لەسەر بدرێت".