دروستکردنی بەربەست لەبەردەم هەڵبژاردن لێدانە لە خواستی خەڵکی کوردستان
پوختەی هەواڵ
بەشی عێراق و هەرێمی کوردستان- سەرۆکی یەکێتیی نیشتمانیی کوردستان ڕایگەیاند، دروستکردنی بەربەست لەبەردەم هەڵبژاردن، لێدانە لە خواستی خەڵکی کوردستان و ناکرێت یاری بەچارەنووسی میللەتێک و بەها باڵاکانییەوە بکرێت.
بەپێی هەواڵی کوردپرێس، بافڵ تاڵەبانی، سەرۆکی یەکێتیی نیشتمانیی کوردستان لەگەڵ ماکسیم ڕۆبین، کونسوڵی ڕووسیا لە هەرێمی کوردستان کۆ بووەوە و بەگوێرەی ڕاگەیەندراوی کۆبوونەوەکە "جەخت لە بەڕێوەچوونی هەڵبژاردن" و "دروستنەکردنی بەربەست لەبەردەم پرۆسەکەدا" کراوەتەوە.
لە کۆبوونەوەکەدا بافڵ تاڵەبانی ئامادەیی یەکێتیی بۆ بەڕێوەچوونی هەڵبژاردن دووپاتکردووەتەوە و رایگەیاندووە: "دەمانەوێت ئەم پرۆسە دیموکراسییە ببێتە مایەی نوێبوونەوەی هەرێمی کوردستان و حوکمڕانییەکی بەهێز و تەندروست".
سەرۆکی یەکێتی ئاماژەی بەوەشکردووە، "دروستکردنی بەربەست لەبەردەم پرۆسەکەدا، لێدانە لەخواستی خەڵکی کوردستان و نیشاندانی ڕوویەکی نەخوازراوی هەرێمی کوردستانە لەبەردەم کۆمەڵگەی نێودەوڵەتیدا، جگەلەوەی ناکرێت چیتر یاری بەچارەنووسی میللەتێک و بەها باڵاکانییەوە بکرێت".
بۆچوونی بەکارهێنەران