بەپێی هەواڵی کوردپرێس، ئاژانسی نۆرس پرێس بڵاوی کردەوە: "مەزڵووم کۆبانی لە رێوڕەسمی یادکردنەوەی نۆ شەهیدی یەکینەکانی دژە تیرۆردا (YAT) گوتارێکی پێشکەش کرد، کە لە 15ی ئازاری ساڵی ڕابردوودا لە ڕووداوێکی کەوتنەخوارەوەی دوو هێلیکۆپتەردا شەهید بوون، لەکاتێکدا ئەوان بە ئەرکێکی فەرمی بەرەو شاری سلێمانی لە هەرێمی کوردستان دەڕۆیشتن".

کۆبانی تیشکی خستە سەر ڕۆڵی ئەو شەهیدانە لە دامەزراندنی هێزەکانی دژە تیرۆردا (YAT)، هەروەها ستایشی قارەمانێتییانی کرد لە بەرەنگاربوونەوەی رێکخراوی تیرۆریستیی داعش و بەرپەرچدانەوەی هێرشەکانی تورکیا و میلیشیاکانی سەر بەوان، هەروەک جەختی لەسەر ڕۆڵی سەرەکییان کردەوە لە جێبەجێکردنی زۆرێک لە هەڵمەتە سەربازییەکاندا، کە بە سەرکەوتوو ناوی بردن.

ناوبراو هەروەها ئاماژەی بە هێرش و پەلامارەکانی هێزەکانی تورکیا و میلیشیاکانی سەر بەوان کرد، گوتی: "ئامانجیان تێکدانی ئاسایش و سەقامگیرییە لە ناوچەکە و تێکدانی ئامرازەکانی بژێوی ژیانە"، کە ئەوان هەوڵی فراوانکردنی دەدەن، جەختی لەوە کردەوە "هەروەک چۆن هەموو هێرشەکانی پێشوومان پووچەڵکردەوە؛ بە پشتیوانی گەلەکەمان رووبەڕووی ئەم هێرشانەش دەبینەوە".