بەپێی هەواڵی کوردپرێس، ئەنجومەنی بزووتنەوەی گۆڕان لە هەولێر لە ڕاگەیەنراوێکدا بڵاویکردەوە، هەواڵی دەستگیرکردنی هاوڵاتییەکی کاسبی شاری هەولێر بەناوی (ئیدریس مەسعوود)، دوابەدوای بەشداری کردنی لە گردبوونەوەیەک و ڕەخنەگرتنی لە بڕیارێکی حکوومەت، مایەی نیگەرانی و ئاماژەیەکی ئاشکرایە بۆ پاشەکشێی دیموکراسی و ئازادی ڕادەربڕین.

ئاماژە بەوەش کراوە، بزووتنەوەی گۆڕان لەگەڵ خەم و ئازار و کێشەکانی پیشەوەر و کاسبکارانە، داواکارن لە حکوومەت و حکوومەتی خۆجێی لەبری کاردانەوە بەرامبەر خۆپیشاندەران و زەوت کردنی مافی قسەکردن و گوزارشتکردنیان بە زمانی سادە؛ بەپیر داخوازییەکانیانەوە بچن و باری گرانی ژیانی خەڵک و کاسبکار و مووچەخۆران سووک بکەن و گوێیان لێبگیرێت.

ئەوەش لە کاتێکدایە، ئیدریس مەسعوود یەکێک لەو کاسبکارانەی شاری هەولێر کە ڕۆژی ڕابردوو لە گردبوونەوەی کاسبکاران دژی بڕیاری هەزران کردنی نان بەشداری کرد و ڕەخنەی لە حکوومەت گرت، دواتر لەلایەن هێزە ئەمنییەکانەوە دەستگیر کرا.