بەپێی هەواڵی کوردپرێس، ئەمڕۆ یەکشەممە، حکوومەتی هەرێمی کوردستان لە ڕاگەیێندراوێکدا بڵاوی کردەوە: "ئەم هێرشە تیرۆریستیە لەلایەن هێزێکی لە یاسادەرچوو بە چاوساخی و هاوکاریی جاش و هاوکارەکانیان بۆ سەر بنکەیەکی هێزی پێشمەرگە، مەترسیدار و شەڕفرۆشتنە.

لە درێژەی ڕاگەیێندراوەکەدا هاتووە: "ئێمە ئەو لایەنانە و حکوومەتی فیدراڵ بە بەرپرس دەزانین بەرامبەر بەم هێرشە ترسنۆکانە، چوونکە ئەم گرووپە لە یاسادەرچووانە لە لایەن حکوومەتی فیدراڵی بوودجە و مووچەیان پێ دەدرێت و چەکدار دەکرێن و بە بەر چاوی حکوومەتی عێراقەوە هاتووچۆ دەکەن و چەک و مووشەک و درۆن دەگوازنەوە و هێرشی تیرۆریستی دەکەنە سەر دامودەزگا فەرمی و سەربازییەکان".

لەبارەی هەڵوێستی حکوومەتی ناوەندییەوە، حکوومەتی هەرێمی کوردستان ئاماژەی بەوە کردووە، "لەکاتێکدا کە حکوومەتی عێراق بێ‌دەنگ و بێ‌توانایە بەرامبەریان، بەڵام ئازایە لە بڕینی قووتی خەڵکی کوردستان و بە هەمان پارە ئەم گرووپانە پارەدار دەکرێن".

حکوومەتی هەرێمی کوردستان لە راگەیێندراوەکەیدا دەشڵێت، "چاوەڕوانی وەڵام و هەنگاوی کرداری لە بەڕێز سەرۆک‌وەزیرانی حکوومەتی فیدراڵی دەکەین لە سزادانی ئەم گرووپانە و هەر وەڵامدانەوەیەکیش لە کات و ساتی گونجاودا بە مافی خۆمان دەزانین. داواش لە هەموو دۆست و لایەنەکان دەکەین کە لەو کردارە تیرۆریستیە بێ دەنگ نەبن و پشتیوانمان بن بۆ هەر بەرپەرچدانەوەیەک کە بە گونجاوی بزانین".