بەپێی هەواڵی کوردپرێس، سەرۆککۆماری تورکیا لە لووتکەی ناتۆ سەبارەت بە هەناردەکردنەوەی نەوتی هەرێمی کوردستان بۆ وڵاتەکەی کە لە کۆتاییەکانی مانگی ئاداری ئەمساڵ ڕاگیراوە، رایگەیاند: "ئێمە لەبارەی وەرگرتنی نەوتی عێراق هیچ کێشەیەکمان نییە. ئەو کێشەیەی روویداوە لەناوخۆی عێراق لەنێوان حکوومەتی ناوەندی و حکوومەتی باکووری عێراقدایە".

سەرۆککۆماری تورکیا هەروەها گوتی "هاوڕێیەکانم ئەرکدار کردووە بۆ بەدواداچوونی ئەم پرسە و ئەنجامدانی دیدار و کۆبوونەوە لەگەڵیان دەکەن".

ناوبراو دەشڵێت: "هەروەها ئێمەش لەمبارەیەوە هەنگاومان ناوە بۆ ئەوەی دەسەڵاتی هەرێمی کوردستان و حکوومەتی ناوەندی کێشەکانیان چارەسەر بکەن و تێیپەڕێنن. هەر کاتێک ئەم کێشەیە تێپەڕێندرا، ئێمە لەگەڵ ئەوەداین هێڵی بۆڕییە نەوتییەکان بکرێنەوە. چوونکە لەسەر بنەمان قازانج-قازانج کاردەکەین. ئەوان قازانج دەکەن و ئێمەش قازانج دەکەین".