بەپێی هەواڵی کوردپرێس، لە کاتی گەڕانەوە لە سەردانەکانی بۆ بەشە تورکییەکی قوبروس و ئازەربایجان، ئەردۆغان لە ناو فڕۆکەکەیدا وەڵامی پرسیاری رۆژنامەنووسانی دایەوە و باسی لە بابەتەکانی رۆژەڤ کرد.

سەبارەت بە رێڕەوی زەنگەزور، ئەردۆغان باسی لەوە کرد کە ئەوە کێشەیەک نییە پەیوەست بێت بە ئەرمینیاوە، بەڵکوو پەیوەستە بە ئێرانەوە و گوتی: "هەڵوێستی ئێران لەو بارەیەوە ئێمە و ئازەربایجانیشی نیگەران کردووە".

ئەردۆغان هیوای خواست کە لە ئایندەیەکی نزیکدا ڕێڕەوی زەنگەزور لە شێوەی ڕێگای قیرتاو یان هێڵی ئاسن پێک بێت و ڕێگایەک لە پەکینەوە بۆ لەندەن بکاتەوە ئەوەش بە تێپەڕین بە ئازەربایجان و تورکیادا.

ئەردۆغان لە وەڵامی پرسیارێکدا سەبارەت بەوەی کە کەمال کڵیچدارئۆغڵو سەرۆکی پارتی گەلی کۆماری (جەهەپە)یش پێشنیارێکی بۆ دروستکردنی ڕێڕەوێکی لەو شێوەیە لە کاتی هەڵبژاردندا کردبوو؛ وتی: کڵیچدارئۆغڵو هیچ لە ڕێگاوبان و هێڵی ئاسن تێناگات. پێشتر باسمان لە پڕۆژەی ڕێگای ئاوریشم کردووە کە لە چینەوە دەست پێدەکات. قلیچدارئۆغڵو بۆ بەدەست هێنانی چەند دەنگێک ئەم قسانەی کرد.