بەپێی هەواڵی کوردپرێس، وەزیرانی دەرەوەی ڕووسیا، تورکیا، ئێران و سووریا لە مۆسکۆی پایتەختی ڕووسیا کۆ بوونەوە، دوای کۆبوونەوەکە لە بەیاننامەیەکدا باسیان لەوە کرد: "سێرگی لاڤرۆڤ، وەزیری دەرەوەی ڕووسیا،  فەیسەڵ میقداد، وەزیری دەرەوەی سووریا، حوسێن ئەمیر عەبدوڵڵاهیان، وەزیری دەرەوەی ئێران و مەولوود چاوشئۆغڵو، وەزیری دەرەوەی تورکیا کۆبوونەوە و ڕەزامەندییان دەربڕیوە کە جێگرەکانیان ڕاسپێرن بۆ ئامادە کردنی نەخشەڕێگایەک بۆ پەرەپێدانی پەیوەندییەکانی نێوان دیمەشق و ئەنقەرە".

لە راگەیەندراوەکەدا هاتووە، "رێککەوتوون لەسەر ڕاسپاردنی بریکاری وەزیری دەرەوە بۆ ئامادەکردنی نەخشەڕێگایەک بۆ پەرەپێدانی پەیوەندییەکانی نێوان تورکیا و سووریا، بە هەماهەنگی لەگەڵ وەزارەتەکانی بەرگری و هەواڵگریی ئەو چوار وڵاتە".

ئەوەش خراوەتەڕوو، "وەزیرەکان ئەو کەشوهەوا ئەرێنی و بنیاتنەرەیان دووپات کردەوە کە لە ئاڵوگۆڕی بیروڕادا هەبوو، هەروەها ڕێککەوتن لەسەر بەردەوام بوون لە پەیوەندییە ئاست بەرزەکان و دانوستانە تەکنیکییە چوارقۆڵییەکان لە ماوەی داهاتوودا".

هەروەها ئاژانسی RIA Novostiی ڕووسی بڵاوی کردەوە، لاڤرۆڤ لە کۆبوونەوەکەدا ڕایگەیاندووە "دەستپێکردنی پرۆسەی ئاسایی کردنەوەی پەیوەندیی تورکیا-سووریا کاریگەری ئەرێنیی لەسەر دۆخی ناوچەکە و رۆژهەڵاتی ناوەڕاست بەگشتی هەیە".

هەروەها وەزیری رووسیا پرۆسەی ئاسایی کردنەوەی پەیوەندییەکانی بە ئامرازێک زانی بۆ کردنەوەی دەرفەتی نوێ بۆ دانیشتنەکانی ئاستانا بۆ یەکلا کردنەوەی قەیرانەکانی سووریا.