بەپێی هەواڵی کوردپرێس، هەرێم کەمال ئاغا سەرۆکی فراکسیۆنی یەکێتی لە پەرلەمانی عێراق کە هاوکات ئەندامی سه‌رکردایه‌تی ئه‌و حزبه‌شه‌، بە دەنگی ئەمریکای ڕاگەیاندووە: "هێزی هاوپەیمانان بە سەرکردایەتی ئەمریکا بۆ پاراستنی ئاسایش، پێشوەخت تورکیایان لە سەردانەکەی شاندێکی باڵای هەسەدە و کارمەندانی سەربازیی ئەمریکا بۆ سلێمانی ئاگادار کردبۆوه‌".

ئه‌و به‌رپرسه‌ى یه‌کێتى وتوویه‌تى: "هاوپەیمانان، تورکیا و عێراقییان لە کۆبوونەوەکەی بەرپرسانی هەسەدە و بەرپرسانی ئەمریکا و یەکێتی لە کاتی هاتنی شاندەکە و رۆیشتنیان لە سلێمانی ئاگادار کردبۆوه‌، ئیتر چ پێویست به‌که‌سێکی تر هه‌یه‌ زانیاریی بدات له‌وه‌ی که‌ مه‌زڵووم کۆبانی لە سلێمانیە؟".

هەرێم کەمال ئاغا، هەروەها نکوڵی دەکات لەوەی زانیارییەکان لای هەرێمی کوردستانەوە دەرچوبێت و ئه‌وه‌شى وتووە: "هێزه‌کانی دژه‌تیرۆر هێزێکی زۆر تۆکمه ‌و به‌هێزن‌ و ناوێکی به‌رز و جوانیان هه‌یه،‌ به‌رده‌وام ئۆپراسیۆنیان هه‌یه‌ له‌گه‌ڵ سوپای عێراق‌ و له‌گه‌ڵ سوپای ئه‌مریکا بۆیه‌ هێزێکی متمانه‌پێکراوو به‌هێزن، ئێستاش به‌رده‌وام له ‌ئۆپراسیۆنه‌کان چالاکی به‌رده‌وامیان هه‌یه‌".