کوردپرێس:

میدیای دۆیچەڤێللە لە زاری هایکۆ ماس وەزیری دەرەوەی ئەڵمانیا ڕایگەیاند ئوپەراسیۆنی هاوبەش لەگەڵ فینلاند بۆ گەڕاندنەوەی منداڵان و ژنانی سەر بە داعش کە هاووڵاتیی وڵاتی ئەوان بوون بە شێوەیێکی سەرکەوتوو وەرگیراونەتەوە و 18 منداڵ و 5 ژنی ئەڵمانی لە کەمپی ڕۆژ و هۆڵ وەرگیراون کە ئەو دوو کەمپە لە ژێر دەسەڵاتی کوردی سووریان.

سێ کەس لەو ژنانەی گەڕێندراونەتەوە ئەڵمانیا بە تۆمەتی بەشداری کردن لە کردەی تیرۆریستی دادگایی دەکرێن. گۆڤاری شپیگێل نووسیویەتی: ئەفسەرانی پۆلیسی فیدراڵی ئەڵمانیا زیندانییە داعشییەکانیان لە ناوچەی ژێردەسەڵاتی کوردەوە تا ئەڵمانیا هێناوەتەوە.

وەزیری دەرەوەی ئەڵمانیا گوتیشی بەرنامەی گەڕاندنەوەی هاووڵاتییانی ئەڵمانی لە ناوچەی ژێردەسەڵاتی کوردی سووریا پاش چەندین مانگ کاری هەماهەنگی و هاوبەش ئەنجام دراوە.

هایکۆ ماس باسی ئوپەراسیۆنێکی هاوبەشی ئەڵمانیا و فینلاندیشی کرد بۆ گەڕاندنەوەی ئەندامانی بنەماڵەی داعشیەکان لە ناوچەی ژێردەسەڵاتی کوردەکانی سووریا. فینلاندیش ژمارەیێک لە هاووڵاتییانی خۆیی لە کوردەکان وەرگرتووەتەوە کە ئەو هاووڵاتییانە لە سووریا پێوەندییان بە داعش کردبوو.

بەگوێرەی نووسراوی گۆڤاری بیڵدی ئەڵمانیا ئێستاش 70 هاووڵاتیی ئەڵمانیایی لەگەڵ 150 منداڵی لەدایکبووی هاووڵاتیی ئەو وڵاتە لە کەمپەکانی ژێردەسەڵاتی کوردی سووریا ماونەتەوە.